My kant van die draad

Oom Loggie se songedroogte tamaties in die oond Junie 24, 2008

Ek het hierdie kookboek van Lochner de Kock. Sommer Oom Loggie vir ons wat sy Kraaines-dae onthou…

Hy vertel mens maak songedroogte tamaties sommer in die oond, en ek kan getuig dat dit inderdaad baie lekker werk.  

Vat ‘n klompie lekker ryp, mediumgrootte tamaties, sny middeldeur, en pak op ‘n oondrak of in ‘n vlak oondpan met die gesnyde kant nou na bo. Gooi gelyke hoeveelhede sout en suiker op en druk in ‘n koel oond. (So tussen 60 en 70 grade C) Maak met die tamaties soos wat jou Ouma beskuit sou uitdroog. Dit vat baie lank, maar jy sal na 8 of 10 ure sien die tamaties lyk nou soos die tipe wat jy in die winkel kry. 

Hulle smaak net soveel lekkerder. Lekkerrrrr. Preserveer dié wat jy nie gebruik nie, in ‘n bottel onder olyfolie.

H 

Windgat ‘Jamie Oliver’ broodjies Junie 23, 2008

Hier is my resep, ‘stolen from the best with pride‘ vir broodjies amper soos wat Jamie dit maak. Dis erg lekker so vir sommer. 

Kry eers vir jou spul deeg. Maak jou eie (Ma Rita se resep later) of koop sakkie-deeg by Spar. Werk lekker. 

Nou het jy nodig: vars koljander, songedroogte tamaties (Loggie se resep elders), ‘mors-erella’ kaas en olywe sonner pitte.

Dis maklik. Chop alles behalwe die deeg op. (As jy nog alleenloper is en jy het toevallig gaste van die teenoorgestelde geslag, gebruik ‘n baie groter mes as wat nodig is en chop bietjie woester. Dis baie indrukwekkend as jy soos die ouens op BBC food kan chop, so oefen dit. Hou pleisters naby – ek het altyd ‘n ‘spare’ onder die chopping board vas ge-cellotape) Maak die deeg sulke mooi handgrootte vorms plat. Meng nou die gechopte olywe, tamaties en kaas en bietjie van die koljander en stop die deeg vormpies vol met die mengsel. Vou mooi toe en maak seker dat jy die naat van die gevulde ‘buns’ seël – anders gaan jy skoonmaak tot die broodjies al koud is..

Bak in ‘n warm oond (180 C) vir  lank genoeg – so 30  - 40 minute. Die broodjies sal lekker bruin word en soms sal die kaas uitsmelt – dis te warm.

Lekerrrrrr….Geniet

H